Gmejna
Gmejna Radwor leži sewjernje Budyšina w rjanej Hornjej Łužicy we wuchodźe Swobodneho stata Sakskeje, někak mjez zwjazkowymaj dróhomaj B96 na zapadźe a B156 na wuchodźe.
Gmejnski zarjad je we hłownej wsy, w Radworju, 10km sewjernje Budyšina, zaměstnjeny. Na přestrjeni 33 km bydla w gmejnje někak 3400 wobydleri w Radworju a přisłušnych 23 wjeskach.
Hłowna wjes gmejny - Radwor - bu w lěće 1359 k prěnjemu razej pisomnje naspomnjena. Jónkrótne w Sakskej je, zo je so we wsy z ewangelskim swětnym patronatstwom katolska wěra a cyrkej, njehladajo zasakłych prócowanjow knjejstwa w lětach mjez 1575 a 1675 ewangelsku wěru zawjesć, přesadźiła. Hač do dźensnišeho je sej tu nahladny podźěl ludnosće serbsku narodnosć a katolske wěrywuznaće zdźeržał.
Krajina, přiroda a ludźo su dobre přičiny za wopyt gmejny runje tak kaž tradicionalne nałožki a kultura Serbow. Su to nałožki kaž jutrowne jěchanje, Marijanske mejske procesiony a procesiony na Bože ćěło druhi štwórtk a slědowacu njedźelu po swjatkach. Za přirodu lubowaceho wopytowarja su w sewjernym směrje přirodoškitne pasmo Łučinski hat ze swojej jónkrótnej ptačinu, holanske lěsy Chasowa a pod Kaponicu (200m nad NN) kaž tež hatna krajina Holešowa a Łomska doporučene. Wobhladanja a dožiwjenja hódne je tež Minakał ze swojim krasnym parkom z barokowym hrodom a na sewjerowuchodźe gmejny biosferowy rezerwat UNESCO Hornjołužiska hola a haty.
